Thanks for Being Late By Thomas Freidman

Mid ka mida saxafiyiinta qoraalladooda loogu akhriska badanyahay wargeyska Newyork Times, Thomas Freidman ayaa qoray buuggaan, wuxuu ciwaan uga dhigay Thanks for Being Late, wuxuu kaga hadlayaa xawaaraha iyo isbdalka degdega ah ee dunida ku socda, isagoona laf dhabar uga dhigaya Technologyadda, isku xiranka adduunyada (Globalization) iyo isbadalka Cimilada (Climate Change). Wuxuu farriin caro badan ka muuqato u dirayaa guud ahaan dunida, gaar ahaan shaqsiyaadka hoggaamiyayaasha ah iyo waddamada aan ku baraarugsaneyn xawliga ay dunida ku socoto iyo sida ay ummaduhu u kala fogaanayaan iyagoo isku dhaw. Wuxuu leeyahay sedexdaas ayaa tiirar u ah deg-dega iyo xawaaraha dheeraya ee ay dunidu ku socoto, dalkastana waxey uu saameyn doonaan hadba inta uu lafal galo iyo goorta uu fahmo sedexdaas arrimood.

Wuxuu ku billaabaya buugga qiso yar oo dhexmartay isaga iyo nin Ethopian ah, oo ka shaqeeya Garaash uu gaarigiisa ku baakiman jiray, ninkaas oo maalin ku oranaya waan ku aqaana Thomas, inaad waxku qorto Newyork Times, ee aniguna qoraa ayaan ahay ee ogow. Thomas wuxuu oganaaya in ninkaan leeyahay Blog yar, uuna uga faalloodo dhaqaalaha iyo siyaasadda dalkiisi Ethopia, blogiisana laga akhristo ilaa 39 waddan oo kale. Wuxuu is weydiinaya haddii nin ka shaqeeya Garaash ku yaalla Washinton uu doonayo inuu dalkisii Ethopia ku yeesho saameyn, uuna waxka badali karo afkaarta dadkiisa, bal waxa ay dunida uga dhigantahay xilligaan iyo waxa ay sameyn karaan dadka isaga ka aqoonta badan, kana saameynta badan, meeqa ayaa sidaas dhanka xun uga faa’iideysan karta, oo farriimo xun faafin karta ayuu is weydiinayaa?

Thomas wuxuu sheegayaa in sanadkii 2007-dii ay dunida ku dhifatay dabeyl Technologyadeed. Odeyga Maalqabeenka ah, kana mida shaqsiyaadkii maalgashaday shirkadaha Netscape, Google iyo Amazon Johan Doerr wuxuu leeyahay waxaan xasuustaa 9 Janaury, 2007, Steve Jobs, oo stage ka saaran si uu dadweynaha ugu soo bandhigo nucii ugu horreeyey ee Iphone, oo aan nuciisa horay loo arag. Wuxuu leeyahay Johan Doerr, Telfoonkaas markii iigu horreysay aniga iyo labo saaxibadeena ah oo dariskeena ah ayaa u raacnay Steve Jobs garoon ay gabadhiisu ciyaar ku lahayd, intaan ciyaarta daawaneynay, ayuu igu yiri Apple waxey soo bandhigi doontaa nucii telfoon ee ugu horreeyey dunida, miisaankiisu waa fududyahay, waa koobanyahay, waa simanyahay, qaadkiisu waa weeynyahay, internetka ayaad ka dhex isticmaaleysaa, telfoonkiina waad wacan kartaa, intaas waxaa kuu dheer wuxuu leeyahay keliya hal button, kadibna jeebkiisa ayuu gacanta galiyey wuxuuna kasoo bixiyey telfoonkii uu ii sheegayey. Sidaas wuxuu kasoo xiganayaa qoraaga buuggu, ganacsadaha iyo maalgaliyaha John Doerr.

26 September, 2006 Facebook oo markii hore loogu talagalay ardeyda dugsiga sare iyo Jaamacadaha iney ku xariiraan ayaa loo fasaxay in uu furan karo qofkasta oo dunida jooga. 2007 shirkad yar oo qoraallo gaagaban lagu soo gudbin jiray, kana mid ahayd shirkado badan oo la isla leeyahay ayaa gooni u istaagtay, waa Twitter. Github oo ah madal ay ku kulmaan Developers ka, ayna halmar 50 developer iyo ka badan uga wada shaqeyn karaan hal Software ama hal App ayaa la sameeyey 2007-dii, gadaalna waxaa ka iibsan doona Microsoft, isla sanadkii 2007-dii Google waxey iibsatay Youtube, waxeyna soo saartay Mobile kiciyaha ugu weyn ee Android, oo la tartami doona kan Apple ee IOS, isla 2007-dii waxaa markii ugu horreysay guri Apartment ah lagu kireystay AirNB, oo ah halka ugu weyn ee guryaha laga kireysto iyo Hotellada, Amazon waxey soo saartay Kindle, oo sahlayaa inaad kumanaan Buug ku aqrisan karto.

Isbadalka Cimilada darteed meelaha qaar ayaa dhirtii nabaad guurtay, meelaha qaar xilliyadoodii roobka iyo kuleylka ayaa kala wareegay, qaar ayaa dhulkii qallalay, meelaha qaar ayaa carruurta ku dhalata 5 tii cunugba mid xanuunsanyahay, deeganada adduunyada qaar ayaa dabeyl lala joogi la’yahay, qaar ayaa dhalmadii dadku isdhintay si iskeed ah, qaar ayaa xawayaankii iyo xoolihii ka dhammaadeen, inkastoo ay siyaasad tahay haddana isbadalkaas Cimiladu wax indhaha laga qarsan karo ma ahan, waxaana keenay warshadaha iyo qiiqa. Reer Galbeedku waxey taagan yihiin waxaa hawada wasaqeeyay warshadaha ee hala joojiyo, Afrikaanka iyo dowladaha Asia qaar badan oo ka midana waxey leeyihiin waa siyaasad oo markaan inagu warshadihii billownay ayaad nagu fureysaan arrintaan, idinkuna waxaad u gudubteen Artificial intellegence iyo Technology, oo qiiq waad ka gudubteen.

Haddii sidaas ay Technologyaddu u badashay adeegsiga Internet ka iyo qalabkii shaqada, wuxuu leeyahay waxaa iyagana isbadal ku dhacay hab dhaqankii dadka, anshixii, sidii wax loo baran jiray iyo sidii loo fakari jirayba. Dadku waa dag-dagayaan, waxyaabo badan dhaqsi ayaa lagu caajisayaa, dhaqsi ayaa lagu iloobayaa. Waxaa guud ahaan isbadalay hab nololeedkii dadka, waxaa caadi noqotay, oo bulshadii si cad u aqbashay guurka dadka isku midka ah jinsi ahaan, gabdhihii qaar waxey leeyihiin waanka maaranay raggii, waxaas in deg deg loo aqbalo oo ay caadi noqoto waxaa u sabab ah Technologyada ayuu leeyahay.

Wuxuu sidoo kale ka hadlayaa Qulqulka iyo tahriibka dadka ee kusii socda reer Yurub, oo uu leeyahay waxaa sabab u ah dowladihii Afrikaanka ee dulmiga lagu dumiyey sida Libya, taas oo uu leeyahay reer Galbeedku markii hore ayey ka fiirsan waayeen, haddana ciqaabta faduushoodii hore ayey marayaan. Technologyaddu wixii hadda ka horreeyey dadka ayey dhiseysay, oo waxbey fududeyneysay laakiin hadda iyadaa dumineysa dowlado badan oo xoogganaa ayaa Technologyadda iyo Social Media lagu dumiyey. Bal soo soo xasuuso kolba heerkii ay soo mareysay Technologyaddu kacdoonkii daabacadda Printing Press, Telegraph, Typewriter, Mainframe Computer, Personal Computer (PC), Internet, Laptop, Mobile Phone, Web Search, Mobile app, Big Data iyo Cloud Computing, AI iyo waxa hadda ugu dambeeya oo ah baaburta aan darawalka ubaahneyn.

Xawaaraha iyo dhaldhalaalka adduunka waxaa ku hoos qarsoon oo isaguna xawaare aan yareyn ku socda kan bulsho, oo haddii aan la hagin, oo aan lala socon laga shallaayi doono, meel xunna ina gaarsijn doona, waxaan la yaabay haddii dadkii dowladaha lahaa, institutions ku u dhisnaayeen sidaas uga walwalayaan isbadalka waqtiga, cimilada iyo Technologyadda dalalka nugul, ee misana dayacan sideena oo kale yaa innoo maqan?

W.Q Mohamed Raygal

Published by

Ahmed Y. Hassan

Interpreting My view in Somali Politics and There Economy, Bs/Economics/Separationist/Somalilander, do not miss the reports I publish here

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s